La piaza de la stazion che tuti conosi come le sue scarsele.
Quando che passo me vien sempre in a mente come che la iera sta piaza nei anni ’60  e ’70. Un bazar per i yughi che viniva con tuti i mezi de oltre confin per comprar vestiti e sopratuto jeans. Come che tuti sa la piaza ga un tondo in centro e un cercio che gira tondo, sì, insoma, come un cercio. Ben su sto cercio ghe iera una bancarela tacada de l’altra.
Tuti a vender maiete e jeans. I mati che gaveva ste bancherele iera povera gente che se gaveva ingegnà de viver cusì e ogi, lori o i sui fioi, ga le più bele ville in Carso.  Insoma tuti ga fato una fortuna immensa. Tanti iera foresti del sud.
Mio suocero Gianni, de Trieste, che gaveva una impresa de marmi vizin via Lamarmora che no la andava ‘ssai ben e che po’  la xè andada più mal che no se pol,  el gaveva pensà de meter su una bancarela, ma tuti in famea ghe diseva che iera poco fin, che lu no doveva misiarse con quela gente e meterse a far un lavor cusì volgare.
E cusì per far un mestier fin el se ga rovinà del tuto.
La foto che mi go fato e che vedè qua in bianco e nero la xè stada fata in un giorno de fredo (anni ’70), durante la setimana perchè al sabato iera praticamente imposibile caminar tanta iera la gente ,  anche se ghe iera piova o bora.

Me vien anche in a mente pasando de la piaza che su quele panchine ga dormì la moglie de James Joyce quando che i due xe rivai a Trieste col treno e lu ghe ga dito: “Nora, spetime qua un momento, sèntite su sta panchina che vado veder dove che dovemo andar” .
E là sta povera dona la se ga sentà,  ma anche distirà per dormir sola tuta la note perchè el mato iera finì in canon perchè per far la traduzion fra marinai inglesi che se le sonava con dei triestini, i gendarmi ga pensà che anche lui iera un sbarufante e via dentro in canon.
Povera mula chisà cossa che la pensava,  cossa la gaverà magnà, dove la gaverà fato pipì.

Ogi la piaza xe come morta, bruta e sporca. I grandi alberi varda tristi e sembra dirghe a quei più giovani da poco piantai “auguri fioi speremo che la ne vadi ben perchè qua a Trieste sembra che quei del Comun la gabi con noi e noi speti altro che segarne”
Sulle panchine qualched’un sentà o distirà, gente che parla lingue sconosude, ma anche gente de quà che ga perso la casa e che in quei paraggi vivi (vivi ?!?),  qualched’un che traversa veloce la piaza per andar a cior qualche bus o andar in stazion.
Mai nisun turista a vardar la statua de Sissi,  la moglie de Franz Josef.
Anche ela no ‘ssai fortunada come quela che ga dormì ai inizi del ‘900 su una panchina,  perchè esser la moglie de un tipo come el Joyce doveva esser ‘ssai dura. Sempre a far valigie per traslocar de un quartier a un altro perchè i lo butava fora perchè nol pagava mai l’afito.  Povera donna.
E anche povera Sissi, ma tutti sa tuto de ela, de la sua vita perchè per television i ga dado un mucio de volte i film con  la Romy Schneider che fazeva Sissi. Che po’  la iera cognada de un’altra, anche quela disgraziada, la Carlotta moglie de Massimiliano, insomma quel de Miramar.

(seguono altri articoli su Piazza  Libertà)